100 joar
”Dag meneer Hendriks, ich kóm Uch proficiat wunsje mit Uch 100 joar.
Dat is toch geweldig dat dier zoeë aod zeet gewoeëde.”
”Vingste”? ”Eh... ja ich dach ’t waal meneer Hendriks”
”Dich mós neet dinke uëver get was te neet beoerdele kans, menke”
”Mè d’r zint toch mar wieënig lüj die dat hoale meneer”
”Kiek dat is get angesj, mè doe mós neet zoeë mar mene en bewere
dat ’t geweldig is um zoeë aod te zieë, want dat is ’t neet.
Ich binlangkrankgeweë en noe is ’t gelukkig wer get beëter mit mich.”
”Dus ’t geet noe wer good?”
”Neë, neet good, mè beëter.”
”Mè went ’t beëter geet is ’t toch good.”
”Joa, mè ’t zouw beëter zieë went ’t good woar.”
”Vertelt mich ins meneer Hendriks, wat hat dier d’r vuur gedoa um zoeë
aod te weëde.”
”Ieësjtens has te doa nieks uëver te zage, mè dier jóng lüj wit
zoeëget neet en twieëdens.....
”Nou, vier zouwe dat neet wete....”
”Noe mós te mich neet ummer óngerbreëke, of zeet dier inne van die
van d’r televisie, die óch allezeleëve mit hön lang ego-moel d’r tusje
hange?, da zaan ich al nieks mieë.”
”Neë meneer mak Uch mar neet óngerus, ich bin geweun van de gezet
en ós leëzers vinge dat zier interessant um te wete wie ’t mit Uch
geet en wie d’r Uch veult. Geer zouwe de lüj ins get wille wete
uëver Uch leëve en va vreuger en zoeë. Wat d’r gedoa hat, woeë d’r
gewirkt hat, of d’r óch kinger hat, wie lang de vrouw doeëd is,
uëver Uch hobbys, Uch vrung, aod kollega’s, of dier ummer in ’t
zelfde hoes gewónd hat, get uëver Uch hulp went Dier die hat,
wie deks dat ze noa Uch kump, mesjie get uëver reze die d’r gemak
hat, bei welke vereniginge Dier zeet geweë en nog anger dinger die
interessant zint vuur ós leëzers.”
”Bis te oet gebreuzeld”?
”Dich bis al wie die televisiemenkes en vruikes, ich dink nog wal
ing graad erger. Wat huët dier uch toch geer zelf bazele. As ’t
zoeë mót da gank mar, ich dach das te noa mich koams loestere
en noe mót ich mich deë kal van Uch aa hure.
Drink ’t glas leëg en gank zouw ich zage.”
”Och neë estebleef meneer Hendr.....” ”Alli da, ich zal dich nog
ee kenske geëve,dich bis nog jónk en mós och vuur die broeëd
wirke. Bis zieëker getrouwd”?
”Joa meneer.” ”En has te óch kinger”? ”Joa meneer, twieë.”
”Én loestere die óch good noa pap en mam”? ” Zieëker wete meneer,
hieël erg good.”
”Woarum dees doe zelf dat da neet? Dich mós van inne ervare
miensj wie ich good beseffe dat de hooftaak van ’ne journalis is:
LOESTERE. Angesj kums te ja nieks te wete !”
” Doa hat d’r geliek in meneer Hendriks, ich wool Uch nog vroage....”
”Zuus te doa begins te toch al wer. Wie kan ich noe get va mich zage
wens dich mar blies palavere.” Ja mè, ich mót vuur de gezet..”
Jóng, ich zal dich dieng ieësjte vroag beantwoade:
Wat kans te draa doeë um aod te weëde:
1. vöal beweëge
2. óp tied noa ge bed
3. vuurzichtig zieë mit uëversjteëke
4. dich neet ergere an journaliste.
Zoeë en noe sjud ich mich ee óp de lamp en goa get sjloape.”
”Bedankt meneer Hendriks vuur wat Dier mich verteld hat, de
leëzers zalle doa blie mit zieë ”!